ساڵۆنی کوردستانی نوێ کۆڕی ناساندن و بڵاوکردنەوەی کتێبی (چرای رێی خەبات)ی ئەنجامدا

رۆژی شەممە رێکەوت ٨ی ۲ی ٢٠٢٥ ساڵۆنی کوردستانی نوێ کۆڕی ناساندن و بڵاوکردنەوەی کتێبی (چرای رێی خەبات) کە بەشێکە لەو نامانەی لەنێوان مام جەلال و باڵیۆز د. محەمەد سابیر و کۆمیتەی ئەوروپادا ئاڵوگۆڕ کراوە بۆ باڵوێز د. محەمەد سابیر، سەرۆکی دامەزراوەی سەرۆک جەلال تاڵەبانی ئەنجامدا.

لە پێشەكی كتێبەكەدا،  باڵیۆز د. محەمەد سابیر دەڵێت: "بەشێكی كەمی لەو نامانەی كە بڵاوم كردۆتەوە درەوشانەوەی خەبات و تێكۆشانی یەكێتیی نیشتمانیی كوردستان و شۆڕشە نوێكەیەتی و لەكاتی شەڕە ناوخۆییەكاندا یان جیابوونەوەی حسك و ئاڵای شۆڕشدا لە یەكێتی بە زمانی ئەو قۆناغ و كاتانە نووسراوە،  بۆیە دەبێت حوكم لەسەر ئێستا نەدرێت، بەڵكو بگەڕێنەوە بۆ ئەو كات و ساتانەی كە ئەو نامانەی تیا نووسراوە و بارودۆخی یەكێتیی و شۆڕشی نوێی گەلەكەمان چی بووە و ئەو كارەساتانەی كە بەسەر یەكێتی و شۆڕشدا هاتوون چی بوون".

لە بەشێكی دیکەی پێشەكییەكەیدا، دەشڵێت: "دیارە بەشێكی زۆر كەم لەو نامانەی كە لای من هەن، بڵاوكردووەتەوە، وەكو نموونەیەكی مێژوویی و هیوادارم رووداوەكانی شەڕی ناوخۆ و لێكترازانەكانی ناو یەكێتی و دووبەرەكیی هێزە كوردستانییەكان هەرگیز دووبارە نەبێتەوە و پەندی لێوەربگرین، بە تایبەتی کە نە گەلەكەمان و نە پارت و رێكخراوە كوردستانییەكان بە هەموو لامانەوە سوودمان لەو شەڕە ناوخۆیی و دووبەرەكییە نەبینیووە، هیوادارم هەرگیز ئەو رووداوە ناخۆشانە و دووبەرەكیی و شەڕی ناوخۆی دووبارە نەبێتەوە."
كتێبی (چرای رێی خەبات)، لە سلێمانی و بە تیژاری 500 دانە چاپ و بڵاوكراوەتەوە و کتێبەکە لە ئامادەکردن و کۆکردنەوەی رۆژنامەنووس جەمال لۆلۆیە.