پەیامی دامەزراوەی سەرۆک جەلال تاڵەبانی بەبۆنەی (٣٦)هەمین ساڵیادی کارەساتی کیمیابارانکردنی شاری هەڵەبجە _وە

کارەساتی کۆمەڵکوژی بەرانبەر شاری هەڵەبجە لە ١٦ی ئازاری ١٩٨٨و کیمیابارانکردنی لەلایەن رژێمی پێشووی عیراق و شەهیدکردنی ٥٠٠٠ هەزار هاوڵاتیی سڤیلی و بریندارکردنی بەشێکی زۆر کە تائێستا بە دەست ساڕێژنەبوونی برینەکەیانەوە دەناڵێنن.
ئەمڕۆ ٣٦ ساڵ بەسەر ئەو تاوانە قێزەونەی دەرهەق بە شاری هەڵەبجەی شەهیدی سەربەرز کرا تێدەپەڕێت، بە خەمێكی  زۆر و قووڵەوە یادی ئەو كارەساتە گەورەیە دەكەینەوە كە بەرانبەر گەلی كورد کرا.
كیمیابارانكردنی هەڵەبجە برینێكی قووڵە لەسەر جەستەی تەواوی کوردستانیان و مەحاڵە لەبیر بكرێت. کیمیابارانكردنی هەڵەبجە درێژەپێدەری ئەو زنجیرە تاوانە بوو كە بەعسی دوژمن بۆ سڕینەوە گەلی كوردستان ئەنجامیدا، لەئێستادا پێویستە هەموو هێز و لایەنە سیاسییەکان و پێكهاتەكانی كوردستان یەكڕیز و تەبابن بۆ هێنانەدی مافەڕەواکانی هەڵەبجەییەکان، پێویستیشە دووربکەوینەوە لە درووشم و بە کردار خزمەتی هەڵەبجە بکەین.
داوا دەكەین حکومەتی عیراق هەنگاوی کردەیی بنێت بۆ بە جینۆسایدناسینی ئەم کۆمەڵکوژییەی شاری هەڵەبجە لەسەر ئاستی جیهان و ئاوڕێکی جدی لێ بداتەوە، وەك ئەرك و پابەندیی یاسایی خۆی، كەسوكاری شەهیدان و ئەو قوربانییانەی هێشتا لە ژیاندان قەرەبوو بكاتەوە و چارەسەری تەواویان بۆ بکات و چیتر پشتگوێ نەخرێن.
لەگەڵ ئەوەی بە پارێزگابوونی هەڵەبجە چەندین بەربەستی لەلایەن بەشێک لە فراکسیۆنەکانی پەرلەمانی عێراقەوە بۆ دروست كرا، لەلایەکی دیکەشەوە پێداگریی دەكەین لەسەر رەوایەتی بە پارێزگابوونی هەڵەبجە وەك سیمبۆلی قوربانیدان و شەهیدی دەستی دیكاتۆریەتی بەعس، هەرچەندە بە پارێزگابوونی هەڵەبجە بەشێک لە برینی هەڵەبجەییەکان ساڕێژدەکات و کەمێکیش لە خەمیان کەم دەکاتەوە.
نەمری و سەربەرزی بۆ رۆحی پاكی شەهیدانی هەڵەبجە و سەرجەم شەهیدانی رێگە رزگاریی گەلی كوردستان

باڵیۆز د. محەمەد سابیر
سەرۆکی دامەزراوەی سەرۆک جەلال تاڵەبانی