دەقی وتاری سەرۆکی دامەزراوەی سەرۆک جەلال تاڵەبانی لە سێیەمین کۆنفرانسی نێودەوڵەتیی بواری نەوت و بەڕێوەبردنی پاشماوەکان لە پیشەسازیی نەوت و غاز

بەڕێز راوێژکاری سەرۆک وەزیرانی عێراق بۆ کاروباری پەروەردە و خوێندنی باڵا د. عەدنان ئیبراھیم ئەلسەراج

بەڕێز جەنابی سەرۆکی  زانکۆی کۆیە د. محەمەد زەنگەنە
خوشکان، ماموستایان  و خاوەن پایەکان ھەرکەسە و بە پلەی خۆی

ئامادەبووانی ئەم کۆنفرانسە نێونەتەوەییە 
 بەناوی دامەزراوەی سەرۆک تاڵەبانییەوە گەرمترین بە خێرھاتنتان لێ  دەکەم

بەڕێزان لە رێکەوتی  ٢٧ ی  گەلاوێژی  ٢٠٢٢ , ئەستێرەیەکی گەشاوەی تریش لە ئاسمانی کوردستاندا ھەڵ ھات ئەوەش بەدامەزراندنی دامەزراوەی سەرۆک جەلال تاڵەبانی بوو، دامەزراوەی سەرۆک جەلال تاڵەبانی، دامەزراوەیەکی رۆشنبیری نیشتمانیی ناحکومییە و قازانج نەویستە، ھەڵدەسێت  بە کۆکردنەوەی ھەموو ئەرشیف و بەرھەمەکانی سەرۆک تاڵەبانی لە ھە موو بوارەکانی خەبات و ژیانیدا  وەکو سەرماییەکی میژوویی کە پەیوەستن بە ژیان، خە بات، رێباز و کارەکانی ئەو سەرکردە مەزنەی گەلەکەمان. بۆیە ئەرکی دامەزراوەکەمان ھەم ئەرکێکی پیرۆزە، ھەم قورسیشە، وە ئەوەی جێی ئاماژەیە  کە ئێمە ئەرکی سەرەکیمان ئەوەیە  کە ھەرچی پەیوەست بێت بە ئەرشیف و ژیانی مام  جلال و  رێبازەکەیەوە و کار و خەباتییەوە  کۆی بکەینەوە و بیپارێزین وەکو سەرماییەکی نیشتمانی، لە ھەمان کاتیشدا پابەندین بە ھەموو پرینسیپەکانی سەرۆک تاڵەبانییەوە  بۆ باشتر کردنی  کەرتەکانی رۆشنبیری، مافی مرۆڤـ، یەکسانی جیندەر، ئازادی تاک و دیموکراسی، پەروەردە، تەندروستی و ژینگە  بۆئەوەی کۆمەڵگاکەمان گەشە پێبدەین و بەرە و پێشەوەی  بەرین . 

دامەزراوەی سەرۆک جەلال تاڵەبانی بەئاگایە لەوەی کە کەرتی ژینگە رووبەرێکی پڕبایەخە بۆ ھەمووان. بۆیە دامەزراوەکە سوورە لەسەر ھەماھەنگی لەگەڵ حکومەت، زانکۆکان و رێکخراوەکان بۆ رووبەڕووبوونەوەی کێشە ژینگەییەکان لەڕێگەی کەمکردنەوەی دەردراوە گازییەکان و پاشەڕۆ، ھاندانی ریسایکڵین و پاڵپشتیکردنی ھۆشیاری و پەروەردەی ژینگەیی.

کرداری بەرھەمھێنانی رۆژانەی کۆمپانیاکانی نەوت چەندەھا قۆناغ دەگرێتەوە، ھەر لە گەڕان، بیرلێدان، بەرھەمھێنان، پاڵاوتن، گواستنەوە و دابەشکردن. ھەموو ئەم قۆناغانە کاریگەریی سلبییان ھەیە لە پیسکردنی ژینگەدا سەرباری ئەو زیانە ئابوورییەی کە دەیخەنەوە لە پیشەسازیی نەوتدا، پاشەڕۆی مەترسیدار و بێ مەترسی لە پرۆسەکەدا بەرھەم دێت. نموونە سەرەکییەکانی ئەم پاشەڕۆیانەش بریتییە لە قوڕاوی بیرلێدان،

پاشەڕۆی نەوت، ئاوی پیشەسازی، تەنە کیمیاییە زیانبەخشەکان، بەرمیلی پلاستیک و ئاسن و پاشەڕۆی پزیشکیی ئەو سەنتەرە پزیشکییانەی کە سەر بە کۆمپانیاکانی نەوتن. بەھەمان شێوە پاشەڕۆی ناڕاستەوخۆی زیانەکانیش ھەن، وەک پاشەڕۆی ئەلکترۆنی ( وەک کۆمپیوتەر، تەلەفۆن، پرینتەر، ئامێری لەبەرگرتنەوە)، مەرەکەبی بەکارھاتووی پرینتەر، پاتری بەکارھاتوو و ئامێرە کارەباییەکان. ئەو مادە نەوتییەی لە گۆماوە نەوتییەکاندا ھەن، چ ئەوەی لە پرۆسەی بەرھەمھێناندا دروستبووە یان ھی رووداوەکانی ڕژان یان ھی تانکەکانە، مەترسی تەندروستیی مرۆیی و ژینگەیی گەورەیان لێدەکەوێتەوە. ئەگەرێکی زۆر ھەیە ئەم ماددانە سەرچاوەکانی ئاوی سەرزەوی یان ژێر زەوی، زەوییە کشتوکاڵییەکان و بەتایبەت لەماوەی وەرزی باراندا، پیس بکەن. بەھەمان شێوە مەترسیی ئاگرکەوتنەوەیان ھەیە. 

 زۆر پێویستە جێبەجێکردنی یاسا پەیوەندیدارەکان توندوڵ بکرێت، لەوانەش، یاسای پاراستنی ژینگە، بۆئەوەی مامەڵەکردنی رێکوپێک و دروست لەگەڵ پاشەڕۆکان مەیسەر ببێت و رێگرییەک ھەبێت لە دروستبوونی گۆماوەکانی نەوت یان پاشەڕۆ لە ئاییندەدا...

ئێمە باوەڕمان وایە کە رێکخستنی ئەم جۆرە کۆنفرانسانە زۆر گرنگن بۆ دەست و پەنجە نەرمکردن لەگەڵ ئاڵەنگارییەکانی ژینگەدا کە بەھۆی پیشەسازیی نەوت وگاز دێنەکایەوە.

 ئێمە زۆر سوپاسی زانکۆی کۆیە دەکەین بۆ میوانداریکردنی سێیەمین کۆنفرانسی نێودەوڵەتی لەسەر بەڕێوەبردنی پاشەڕۆ لە پیشەسازی نەوت و گازدا) و ئەم دەستپێشخەرییە بەرز دەنرخێنین. میوانداریی ئەم جۆرە کۆنفرانسانە نەک تەنیا رۆشنایی دەخاتەسەر رۆڵی زانکۆ وەک پێشەنگ لە برەودان بە گەشەپێدانێکی بەردەوام، بەڵکو ھاوئاھەنگیشە لەگەڵ ئەرکی دامەزراوەکەمان کە بەکارخستنی سەرچاوەکان و زانینە بۆ پاراستنی ژینگە و برەودان بەپایەدارکردنی سەرچاوە سروشتییەکان، بۆیە لە ناخی دڵمانەوە پیرۆزبایی  لە زانکۆی  کۆیە، سەرۆک، ھەموو مامۆستا و کارمەندە کانیان دەکەین  کە بە ھاوبەشی لەگەڵ دامەزراوی سەرۆک جەلال تاڵەبانیدا ھەستاوون بە ئامادە کردنی ئەم کۆنفرانسە نێودەوڵەتییە.

 ھەر شاد و سەرکوتووبن، زۆر سوپاس
باڵیۆز د. محەمەد سابیر، سەرۆکی دامەزاوەی سەرۆک جەلال تاڵەبانی