دامەزراوەی سەرۆک جەلال تاڵەبانی و وەزارەتی ژینگەی عیراق یاداشتنامەی لێکتێگەیشتن واژۆ دەکەن

ڕۆژی دووشەممە ٢٤ی ٢ی ٢٠٢٥، باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی شاندی یاوەری لە شاری بەغدا، لەگەڵ د. هەڵۆ عەسکەری، وەزیری ژینگەی عیراق یاداشتنامەی لێکتێگەیشتنیان واژۆ کرد.

باڵیۆز د. محەمەد سابیر، سەرۆکی دامەزراوەی سەرۆک جەلال تاڵەبانی، پاڵپشتی دامەزراوەکەی بۆ وەزارەتی ژینگە دووپاتکردەوە لەڕێگەی چالاکی بنیاتنانی توانا و بەشداریی تەواو و بڵاوکردنەوەی رۆشنبیریی ژینگەیی و بەرەوپێشبردنی ژینگەیی دروست لەڕێگەی گرنگیدان بە هۆشیاری ژینگەیی و بەرنامەی پەروەردەیی وەک (خول، وۆرک شۆپی راهێنان، سیمینار و بەرنامەی پەروەردەیی).

لە یاداشتنامەکەدا هاتووە "بڵاوکردنەوەی رۆشنبیریی ژینگەیی، روواندنی دار و گرنگیدان بە پانتایی سەوزایی، تەواوکردنی ئەو پرۆژانەی کە ئامانجیان زیادکردنی پانتایی سەوزاییە".

لای خۆیەوە د. هەڵۆ عەسکەری وتی: "گرنگیی زۆری دەدەین بەو پێشنیازانەی پێشکەش کراون، ئامادەیی وەزارەتەکەی دەربڕی بۆ هاوکاری، ئاڵوگۆڕی ئەزموونەکان و سوود وەرگرتن لە توانای یەکدی بۆ خزمەتی ژینگەی عێراق و هەرێمی کوردستان" و وەزیری ژینگە وتیشی: "بەشداری کارا دەبن لە باشترکردنی پرسەژینگەییەکان و دۆزینەوەی چارەسەر بۆیان، لە هەمان کاتدا جەخت لەسەر پێویستی بەپەلەی هاوکاریی ئەو دامەزراوانە دەکەینەوە کە تایبەتن بەبواری ژینگە و بەشداری راستەقینە دەکەین لە رووبەڕووبوونەوەی گۆڕانکارییە ژینگەیی و کەشوهەوا، کە پێویستی بە هەماهەنگی هاوبەش هەموو لەلایەنەکان هەیە بۆ کەمکردنەوەی کاریگەرییە خراپەکانی کەشوهەوا".

سەرۆکی دامەزراوەی سەرۆک جەلال تاڵەبانی باسی لەوەش کرد: "هەردوولا رێککەوتین لەسەر  یاداشتێک -لێکتێگەیشتن- بۆ هاوکاری نێوان دامەزراوەی سەرۆک جەلال تاڵەبانی و وەزارەتی ژینگە، لەماوەی داهاتوودا بە گرنگییەوە کاری لەسەر دەکەین، هەوڵەکانیش دەخەینەگەڕ بۆ جێبەجێکردنی ئەو پێشنیاز و داواکاریانەی لە کە لە یاداشتنامەکەدا نووسراون"  و "هەروەها  دانانی پلانی کارکردنی هاوبەش لەنێوان هەردوولادا بۆ بەشداریکردن لە کەمکردنەوەی کاریگەرییە خراپەکانی رووبەڕووی ژینگە دەبێتەوە" باڵیۆز د. محەمەد سابیر وای وت