دامەزراوەی سەرۆک جەلال تاڵەبانی چەند چالاکییەکی زانستی ئەنجام دەدات

ڕۆژی یەکشەممە ١٢ی ٢ی ٢٠٢٣، باڵیۆز د. محەمەد سابیر سەرۆکی دامەزراوەی سەرۆک جەلال تاڵەبانی بە یاوەری وەفدێکی دامەزراوە سەردانی سەرۆکایەتیی زانکۆی سلێمانی کرد و لەلایەن پڕۆفیسۆر د. کۆسار محەمەد سەرۆکی زانکۆ و ئەندامانی ئەنجومەنی زانکۆی سلێمانی پێشوازی لێکرا.

لە دیدارێکدا، د. محەمەد سابیر، باسی لە گرنگی و ڕۆڵی زانکۆی سلێمانی کرد، وتی: "بەرنامە و پلانی دامەزراوەیە لەگەڵ زانکۆی سلێمانی و زانکۆکانی تر؛ کار بۆ بەهێزکردنی بواری زانستی بکەین و لەڕێگەی بۆردی زانستیی دامەزراوەوە لە ئاییندەیەکی نزیکدا چەند چالاکییەکی زانستی لەگەڵ زانکۆکان رێکبخرێت بە ئاراستەی برەودان بە ئاستی زانستی و خزمەتکردنی کۆمەڵگە".

سەرۆکی دامەزراوەی سەرۆک جەلال تاڵەبانی ئاماژەی بەوەشکرد کە دەیانەوێت لە ئاییندەیەکی نزیکدا یاداشتی لێکتێگەیشتن لەنێوان دامەزراوەی سەرۆک جەلال تاڵەبانی و زانکۆی سلێمانی ئیمزا بکرێت.

سەرۆکی زانکۆی سلێمانیش وێڕای خۆشحاڵی ڕایگەیاند: "چاویان لەوەیە کە چالاکیی هاوبەشیی زانستی لەگەڵ دامەزراوەی سەرۆک جەلال تاڵەبانی ئەنجام بدەن بە ئاراستەی زیاتر خزمەتکردنی فکر و دیدی سەرۆک مام جەلال لەڕێگەی لێکۆڵینەوەی زانستی لە ڕەهەندە جیاوازەکانی خەباتی سەرۆک مام جەلال".